Fréttir

Páskafrí hefst mánudaginn 11. apríl. Kennsla hefst aftur þriðjudaginn 19. apríl samkvæmt stundaskrá. Við vonum að allir hafi það gott í fríinu og mæti að því loknu fullir orku til að takast á við síðasta hluta skólaársins. Gleðilega páska.

Árshátíð Njarðvíkurskóla var haldin fimmtudaginn 7. apríl. Mikið var um flott atriði sem Nadía Líf Pálsdóttir og Björn Ólafur Valgeirsson, kynntu til leiks með stakri prýði. Þemað í ár voru söngleikir og mættu nemendur mjög vel undirbúnir eftir stífar æfingar í vetur. Alls voru tíu atriði sýnd í 1.-7. bekk, leiklistarvali, nemendur í Ösp og einnig stigu starfsmenn á svið. Öll atriðin vöktu mikla lukku hjá nemendum og forráðamönnum. Frábær mæting var hjá forráðamönnum sem troðfylltu Ljónagryfjuna enda höfum við vegna samkomutakamarkana ekki náð að halda árshátíð í íþróttahúsinu síðan árið 2019. Eftir árshátíðina fóru gestir og starfsmenn yfir í skóla þar sem boðið var upp á muffins sem nemendur skólans höfðu bakað. Einnig var öllum boðið að skoða nýtt og endurbætt starfsmannarými Njarðvíkurskóla. Frábær dagur í alla staði og eiga nemendur og starfsmenn þakkir fyrir skemmtileg atriði og árshátíðarnefndin og nemendur sem unnu viðhátíðina fyrir frábæran undirbúning og skipulag. Einnig þakkar Njarðvíkurskóli starfsmönnum í íþróttahúsi fyrir frábæra aðstoð. Nemendur sem unnu að hátíðinni voru: Björn Ólafur Valgeirsson, Brynja Þórey Hjörvarsdóttir, Danas Mikulskis, Evan Michael Teague, Falur Orri Benediktsson, Guðmundur Leo Rafnsson, Hendrick James M. Soleminio, Jóhanna Arna Gunnarsdóttir, Kristjana Hilmarsdóttir, Magnús Orri Lárusson, Nadía Líf Pálsdóttir, Ólafía Sigríður Árnadóttir, Páll Guttormsson, Salvar Gauti Ingibergsson, Sæþór Kristjánsson, Unnur Ísold Kristinsdóttir og Veiga Dís Halldórsdóttir.

Árshátíð Njarðvíkurskóla verður haldin á morgun fimmtudaginn 7. apríl kl. 12.00. Hefðbundin kennsla fellur niður þennan dag en nemendur mæta í sínar heimastofur kl. 11:30. Forráðamenn mæta út í íþróttahús og koma sér fyrir í salnum. Fjölmargir nemendur hafa þó hlutverkum að gegna fyrr um morguninn s.s. að vinna að uppsetningu eða æfa sýningaratriði. Þeir mæta því um morguninn samkvæmt fyrirmælum umsjónarkennara. Skemmtidagskrá hefst stundvíslega kl. 12:00 í íþróttahúsi við Njarðvíkurskóla og verða þar frátekin sæti fyrir hvern árgang en gestir þeirra fá sæti í stúku. Gera má ráð fyrir að dagskrá í íþróttahúsi verði í um 60 mínútur. Forráðamenn eru hvattir til að mæta og taka þátt í hátíðarhöldunum með okkur. Eftir dagskrá í íþróttahúsi eru nemendur í umsjá forráðamanna sinna. Afar og ömmur og aðrir fjölskyldumeðlimir eru að sjálfsögðu líka velkomin. Það hefur skapast sú hefð að hafa kaffiveitingar í skólanum fyrir árshátíðargesti að skemmtiatriðum loknum. Í ár verður boðið upp á muffins sem nemendur skólans hafa bakað og öl/kaffi. Á meðan á kaffiveitingum stendur er árshátíðargestum boðið að skoða nýtt og endurbætt starfsmannarými. Við vonumst til að eiga skemmtilegan dag og minnum nemendur á að mæta stundvíslega og snyrtilega klædd. Sjáumst á morgun!

Þemadagar í tilefni af 80 ára afmæli Njarðvíkurskóla fóru fram í vikunni. Árgangar unnu stigskipt að ýmsum skemmtilegum verkefnum sem tengjast sögu skólans og afmælishátíð hans. Nemendur mættu í grænu fyrri daginn og sparilega klædd seinni daginn. Boðið var uppá afmælisköku og ískalda mjólk í boði MS. Nemendur í 10. bekk borðuðu kökuna með starfsmönnum á kaffistofu strarfsmanna. Myndakassi var á sal þar sem nemendur tóku einstaklings- eða hópmyndir. Slegið var upp frábært danspartý í íþróttahúsinu þar sem Emmsjé Gauti kom og hélt uppi stuðinu.

Seinni þemadagurinn í Njarðvíkurskóla er morgun miðvikudag í tilefni af 80 ára afmæli skólans. Kaka og mjólk verður í nestistímanum og Emmsjé Gauti mætir í danspartýið eftir hádegi. Allir nemendur hvattir til að mæta í sparilegum fötum!

Þemadagur í Njarðvíkurskóla á morgun þriðjudag í tilefni af 80 ára afmæli skólans. Allir nemendur hvattir til að mæta í grænu!

Í næstu viku, þriðjudaginn og miðvikudag eru þemadagar í Njarðvíkurskóla. Þessa daga verður unnið með afmæli skólans sem um þessar mundir fagnar 80 ára afmæli. Árgangar vinna stigskipt að ýmsum skemmtilegum verkefnum sem tengjast sögu skólans og afmælishátíð hans. Skólastarf er brotið upp og hefðbundin stundaskrá víkur fyrir öðrum verkefnum. Íþróttir/sund og list- og verkgreinar falla niður þessa daga. Stefnt er að því að taka hópmynd af öllum nemendum og starfsmönnum skólans á þriðjudeginum og hvetjum við alla til að mæta í einhverju grænu á lit þann dag. Á miðvikudeginum verður afmælishátíð og þá hvetjum við alla nemendur til að koma í sparilegum klæðnaði. Í nestistíma verður öllum boðið uppá súkkulaði afmælisköku og ískalda mjólk í boði MS. Daginn endum við svo með danspartýi í íþróttahúsinu og Emmsjé Gauti kemur og syngur nokkur lög. Skóladagurinn hefst kl. 8:15 báða dagana og lýkur á þriðjudeginum kl. 13:20 hjá 1.-4. bekk og 14:00 hjá 5.-10. bekk. Á miðvikudeginum lýkur skóladeginum kl. 13:20 hjá öllum nemendum. Valfög unglingastigs falla niður þessa tvo daga og frístundaskólinn er opin báða dagana.

Lokahátíð stóru upplestrarkeppninnar fór fram í Bergi í Hljómahöll þann 3. mars. Þar komu saman keppendur úr 7. bekk frá öllum grunnskólum Reykjanesbæjar og kepptu fyrir hönd síns skóla. Fyrir hönd Njarðvíkurskóla tóku þátt þær Kristjana Ása Lárusdóttir og Þorgerður Tinna Kristinsdóttir en varamenn þeirra voru Logi Örn Logason og Freydís Ósk Sæmundsdóttir. Fulltrúar Njarðvíkurskóla stóðu sig frábærlega og sýndu hversu mikið þau hafa lagt sig fram síðust vikur og mánuði undir handleiðslu íslenskukennara í Njarðvíkurskóla. Kristjana Ása og Þorgerður Tinna fluttu bókmenntartextann og ljóðin af miklu öryggi og framkoma þeirra var virðuleg og til fyrirmyndar. Sigurvegari keppninnar í ár var Rakel Elísa úr Holtaskóla og Í öðru sæti var Freyja Marý, einnig úr Holtaskóla. Í þriðja sæti var einnig sá sem var í 2. sæti. Í þriðja sæti var Hrund sem var annar fulltrúi Myllubakkaskóla.

Öskudagurinn var haldinn hátíðlegur í Njarðvíkurskóla 2. mars 2022. Yngra stigið fór í þrautir í íþróttahúsinu og eldra stigið tók þátt í ýmsum þrautum í stofunum á 3. hæð skólans. Öskudagur er skertur skóladagur í Njarðvíkurskóla sem og í öðrum grunnskólum í Reykjanesbæ. Nemendur voru í skólanum frá 8:15-11:20 og eftir það lauk skóla. Að loknum skóladegi fóru mörg börn niður í bæ og sungu fyrir góðgæti í hinum ýmsu fyrirtækjum í bænum.

Í Njarðvíkurskóla eru fjölbreyttir valáfangar fyrir nemendur í 8.-10. bekk. Á þessu skólaári er nýtt val sem HS Veitur hf. bjóða nemendum að taka sem nefnist Orka og tækni. Í tímum kynnast nemendur starfsemi HS Veitna, læra um eðlis- og hugmyndafræði á bak við vatn og rafmagn auk þess að fara yfir öryggismál, nýsköpun og þróun hjá fyrirtækinu. Nokkrir nemendur frá Gerðaskóla í Suðurnesjabæ koma einnig inn í þessa tíma. Í lokin verður farið í vettvangsferð og stöðvar HS Veitna skoðaðar. Mikil ánægja er hjá nemendum með þessa valgrein og samstarfið við HS veitur er til fyrirmyndar. Valgrein sem þessi sýnir mikilvægi þess að auka vægi verklegrar kennslu hjá nemendum.