Fréttir

Lífshlaupið fór fram dagana 7.-27. febrúar og tók starfsfólk Njarðvíkurskóla þátt eins og síðustu ár. Njarðvíkurskóli tók þátt í flokknum 70-149 starfmenn og voru í efsta sæti allan tímann. Njarðvíkurskóli var með 87% þátttökuhlutfall og sigruðu að lokum í sínum flokki í mesta fjölda daga og endaði skólinn í 4.sæti í fjölda mínútna. Teymið Heilsueflandi Grunnskóli hélt utan um þátttökuna og skipulagði ýmsa viðburði þessar þrjár vikur, t.d. göngu, bocciamót, bingó og lokahóf. Frábær frammistaða hjá okkar góða fólki.

23. febrúar var Stóra upplestrarkeppnin haldin á sal Njarðvíkurskóla. Það er 7. bekkur sem tekur þátt í þessari keppni og voru það 14 nemendur sem tóku þátt en fyrr í febrúar var haldin bekkjarkeppni þar sem þessir 14 nemendur unnu sér rétt til þátttöku á sal. Keppnin tókst einstaklega vel þar sem allir nemendur höfðu undirbúið sig vel, bæði í skólanum og líka heima fyrir. Jóhann Gunnar Sigmarsson íslenskukennari stýrði keppninni. Nemendur lásu hluta af sögunni Kennarinn sem hvarf og komu síðan aftur upp og lásu ljóð að eigin vali. Dómarar í keppninni í ár voru þau Haraldur Axel Einarsson grunnskólafulltrúi, Ásgerður Þorgeirsdóttir skólastjóri og Lára Guðmundsdóttir fyrrum skólastjóri í Njarðvíkurskóla. Sigurvegarar í keppninni fá keppnisrétt á lokahátíð Stóru upplestrarkeppninnar sem fer fram í Bergi 6. mars. Sigurvegarar í Njarðvíkurskóla voru Bríet Silfá Möller og Rósa Kristín Jónsdóttir. Jökull Gautason var svo valinn sem varamaður. Þau þrjú muna halda áfram að æfa og undirbúa sig fyrir lokakeppnina. Aðrir nemendur sem tóku þátt í skólakeppninni voru: Alan Boguniecki Einar Ernir Kristinsson Elfa Rut Hreiðarsdóttir Elin Mia Y Hardonk Emma Ástrós Gunnarsdóttir Fanney Helga Grétarsdóttir Harpa Rós Ívarsdóttir Helga Björg Bjarkadóttir Jón Ingi Davíðsson Kamilla Sigurlaug Miller Nína Björk Guðjónsdóttir

Öskudagurinn var haldinn hátíðlegur í Njarðvíkurskóla 14. febrúar 2024. Nemendur tóku þátt í fjölbreyttum þrautum í skólanum og í íþróttahúsinu auk þess að fara í draugahús. Öskudagur er skertur skóladagur í Njarðvíkurskóla sem og í öðrum grunnskólum í Reykjanesbæ. Nemendur voru í skólanum frá 8:15-11:20 og eftir það lauk skóla. Að loknum skóladegi fóru mörg börn niður í bæ og sungu fyrir góðgæti í hinum ýmsu fyrirtækjum í bænum.

Skólastarf verður í öllum leik- og grunnskólum í Reykjanesbæ, Suðurnesjabæ og Vogum á morgun mánudaginn 12. febrúar nema eitthvað óvænt komi upp á. Þetta á einnig við um starfsemi frístundaheimila. Þess má geta að skipulagt íþróttastarf hjá börnum og ungmennum fellur niður og því er engin frístundarúta í gangi. Vel gengur að koma og halda hita á skólabyggingum en starfsfólk sveitarfélaganna og aðgerðastjórn Suðurnesja hafa nýtt helgina til að koma fyrir hitablásurum í allar byggingar. Þó að hiti sé góður þá getur verið gólfkalt og því eru nemendur hvattir til að nota inniskó eða vera í ullarsokkum. Ekki er víst að Skólamatur geti afgreitt mat og væri því gott að foreldrar gerðu ráð fyrir að nesta börnin sín að minnsta kosti á morgun. Nánari upplýsingar frá Skólamat koma í kvöld. Staðan verður tekin reglulega og upplýsingar verða sendar frá skólastjórnendum til forráðamanna ef gera þarf breytingar og aðlaga skólastarf að þeim.

Eins og staðan er núna er stefnt að eins miklu skólastarfi og hægt er í komandi viku miðað við aðstæður. Skólastarf fer þó ekki af stað nema við getum tryggt hita í öllum rýmum. Nú erum við að vinna í að útvega hitagjafa og það verður ekki ljóst fyrr en á morgun sunnudaginn hvort það tekst fyrir mánudaginn. Við munum senda út nánari upplýsingar seinnipartinn á sunnudaginn

Miðvikudaginn 14. febrúar er Öskudagur og er það skertur nemendadagur. Skóla lýkur kl. 11:15 og geta nemendur borðað hádegismat áður en þeir fara heim. Frístundaheimili í skóla og Ösp er opið eftir að skóla lýkur til kl. 16:15. Nánara skipulag dagsins kemur frá umsjónarkennara. Fimmtudaginn 15. febrúar er starfsdagur og föstudaginn 16. febrúar er vetrarleyfi í Njarðvíkurskóla. Allir nemendur eiga frí þessa tvo daga og frístundaheimili yngri nemenda og frístund í Ösp er lokað báða dagana. Wednesday February 14th is "Öskudagur" and it is a shortened school day. School ends at 11:15 and students can have their lunch before going home. The after-school center in Njarðvíkurskóli and Ösp are open until 16:15. Further information will come from supervising teacher. Thursday February 15th. we have scheduled teacher's workday and on Friday February 16th we have scheduled winter break at Njarðvíkurskóli. All students are off those two days and the after-school center for younger students and in Ösp is closed both days.

Í ljósi þess að heitt vatn er farið af Suðurnesjum þarf að grípa til lokana víða í starfsemi sveitarfélagsins þar til varalögn kemst í gagnið. Af þessum sökum fellur allt skólastarf niður í Njarðvíkurskóla föstudaginn 9. febrúar.

Þriðjudaginn 30. janúar er samtalsdagur í Njarðvíkurskóla. Forráðamenn bóka viðtal við umsjónarkennara í gegnum Mentor og hér má finna myndband með leiðbeiningum um bókun viðtala: https://www.youtube.com/watch?v=mEFYnJhJAsM - Opnað verður fyrir bókanir 24. janúar kl. 00:01 og geta forráðamenn þá bókað sín viðtöl. Nemendur eiga að mæta með forráðamönnum sínum í viðtalið. Þeir forráðamenn sem eru með túlk í viðtalinu fá úthlutað tímum frá umsjónarkennurum og fá tölvupóst á næstu dögum með tímasetningunum. Óski forráðamenn eftir að hafa samtalið á TEAMS þá þarf að senda póst á umsjónarkennara og óska eftir slíku viðtali en mikilvægt er þó að nemandinn sé einnig í viðtalinu. Viðtöl fara fram í heimastofum nemenda. Þeir forráðamenn sem óska eftir viðtali við fag-, list- og verkgreinakennara, sem einnig eru til viðtals þennan dag, hafa samband við skrifstofustjóra skólans og bóka þau viðtöl. Hægt er að hringja í síma 420-3000 eða senda póst á njardvikurskoli@njardvikurskoli.is. Í viðtalinu verður farið yfir almennt gengi nemandans í skólanum og það námsmat sem lokið er á skólaárinu auk annars. Forráðamenn nemenda í 3., 6. og 9. bekk svara viðhorfskönnun eftir viðtalið og biðjum við þá forráðamenn um að staldra við og svara. Niðurstöður viðhorfskönnunar eru mikilvægur hluti í sjálfsmati skóla og notum við svörin til að gera gott skólastarf enn betra. Frístundaheimili skólans er opið á samtalsdaginn, bæði í skóla sem og Ösp frá kl. 8:15-16:15.

Á aðventunni fékk sérdeildin Ösp veglega gjöf frá Lilju Líf Aradóttur, fyrrverandi nemanda í Ösp. Lilja Líf gaf sérdeildinni körfuboltatæki sem er mikið notað af nemendum í leik og starfi. Njarðvíkurskóli og sérdeildin Ösp þakkar Lilju Líf og fjölskyldu hennar kærlega fyrir gjöfina.

Mánudaginn 15. janúar er starfsdagur í Njarðvíkurskóla. Allir nemendur eiga frí þennan dag. Frístundaheimili yngri nemenda og frístund í Ösp er lokað þennan dag. Monday 15th. of January is a teachers work day in Njardvikurskoli. All students have a vacation this day. The after school program is closed this day. Poniedzialek 15. Stycznia jest dniem pracy nauczyciela w Njardvikurskoli. Wszyscy studenci maja wakacje tego dnia. Program zajec pozalekcyjnych jest dzis zamkniety.