Fréttir

Árshátíð Njarðvíkurskóla var haldin 21. mars fyrir troðfullu húsi. Mikið var um flott atriði sem Ragna Talía Magnúsdóttir, Patrekur Atlason og Hafþór Nói Hjaltason, kynntu til leiks. Nemendur sýndu dansa, leikþætti og söng. Alls voru tíu atriði sýnd sem öll vöktu mikla lukku hjá troðfullu íþróttahúsinu af nemendum, starfsmönnum, forráðamönnum og öðrum gestum. Eftir árshátíðina fóru allir yfir í skóla þar sem boðið var uppá skúffuköku og gos. Frábær dagur í alla staði og eiga nemendur og starfsmenn þakkir fyrir skemmtileg atriði og árshátíðarnefndin og nemendur sem unnu viðhátíðina fyrir frábæran undirbúning og skipulag. Einnig þakkar Njarðvíkurskóli starfsmönnum í íþróttahúsi fyrir frábæra aðstoð. Nemendur sem unnu að hátíðinni voru: Kristján Freyr Davíðsson, Viktor Garri Guðnason, Frosti Kjartan Rúnarsson, Kristinn Einar Ingvason, Kacper Agnar Kozlowski, Hafþór Nói Hjaltason, Patrekur Atlason, Ragna Talía Magnúsdóttir, Hólmfríður Eyja Jónsdóttir, Jökull Ólafsson, Matthildur Mía Halldórsdóttir, Oskar Patryk Szacon, Sara Björk Logadóttir, Svala Gautadóttir, Kristín Björk Guðjónsdóttir og Hulda María Agnarsdóttir.

Árshátíð Njarðvíkurskóla verður haldin fimmtudaginn 21. mars 2024. Hefðbundin kennsla fellur niður þennan dag og frístundaheimilin eru lokuð. Nemendur mæta í sínar heimastofur kl. 11:30. Forráðamenn mæta út í íþróttahús og koma sér í stúku og húsið opnar fyrir gesti kl. 11:30. Einhverjir nemendur hafa þó hlutverkum að gegna fyrr um morguninn og mæta því samkvæmt fyrirmælum umsjónarkennara. Skemmtidagskrá hefst kl. 12:00 í íþróttahúsi við Njarðvíkurskóla og verða þar frátekin sæti fyrir hvern árgang á gólfi en gestir þeirra fá sæti í stúku. Það er því mikilvægt að bekkurinn geti farið saman úr skólanum yfir í íþróttahúsið. Forráðamenn, eru hvattir til að mæta og taka þátt í hátíðarhöldunum með okkur. Eftir dagskrá í íþróttahúsi eru börn í umsjá forráðamanna sinna. Afar og ömmur og aðrir fjölskyldumeðlimir eru að sjálfsögðu líka velkomin. Nemendur skólans koma ekki með síma á árshátíðina því myndataka frá nemendum er ekki leyfð. Eins og þið flest þekkið hefur sú hefð skapast að hafa kaffiveitingar í skólanum fyrir árshátíðargesti að skemmtiatriðum loknum. Í ár verður boðið upp á skúffuköku og öl/kaffi. Við vonumst til að eiga skemmtilegan dag og minnum nemendur á að mæta stundvíslega og snyrtilega klædd.

Dagur stærðfræðinnar er í dag 14. mars. Í tilefni af deginum hefur stærðfræði verið gert hátt undir höfði í vikunni í Njarðvíkurskóla. Nemendur hafa meðal annars verið í stærðfræði á útisvæði, unnið að fjölbreyttum verkefnum og reynt við ýmsar þrautir. Í dag giskuðu nemendur á réttan fjölda af perlum og þeir nemendur sem giskuðu rétt eða voru nálægt tölunni fengu gjafabréf frá Huppu, ísbúð. Vinningshafar á yngsta stigi: Kolbeinn Pétur Hauksson - 1. bekk Emilíana Dís Gunnarsdóttir - 2. bekk Alexander O. Izekor Gíslason - 3. bekk Vinningshafar á miðstigi: Glódís Ýr Eyjólfsdóttir - 5. bekk Eldar Kristján Hafsteinsson - 5. bekk Vinningshafar á elsta stigi: Jón Fannar Haraldsson - 8. bekk Elenborg Ýr Elmarsdóttir - 9. bekk

Innritun er hafin fyrir börn sem eiga að fara í 1. bekk grunnskóla í Reykjanesbæ haustið 2024. Gert er ráð fyrir því að foreldrar séu búnir að skrá börn sín fyrir 20. apríl.

Rafn Markús Vilbergsson hefur verið ráðinn skólastjóri Njarðvíkurskóla. Rafn Markús lauk B.Sc. prófi í íþróttafræði með kennsluréttindi í grunn- og framhaldsskóla frá Háskólanum í Reykjavík árið 2008, M.Ed. í stjórnun menntastofnana frá Háskóla Íslands árið 2014 og hóf nám í opinberri stjórnsýslu við sama skóla árið 2023. Rafn Markús hefur starfað í Njarðvíkurskóla frá árinu 2009, sem umsjónarkennari, deildarstjóri, verkefnastjóri, aðstoðarskólastjóri og starfar nú sem deildarstjóri eldra stigs. Rafn Markús tekur við skólastjórastarfinu af Ásgerði Þorgeirsdóttur sem lætur af störfum í sumar eftir langan og farsælan feril í Njarðvíkurskóla.

Lokahátíð Stóru upplestrarkeppninnar fór fram í Stapa í gær 6. mars. Þar komu saman keppendur úr 7. bekk frá öllum grunnskólum Reykjanesbæjar og kepptu fyrir hönd síns skóla. Keppnin er ávallt sett á Degi íslenskrar tungu, þann 16. nóvember og markmið hennar er að vekja athygli og áhuga í skólum á vönduðum upplestri og framburði. Fyrir hönd Njarðvíkurskóla tóku þátt Bríet Silfá Möller og Rósa Kristín Jónsdóttir, varamaður þeirra var Jökull Gautason. Þau stóðu sig frábærlega og sýndu hversu mikið þau hafa lagt sig fram síðustu vikur og mánuði undir handleiðslu Auðar Ásgrímsdóttur, Jóhanns Gunnars Sigmarssonar og Margrétar Rósu Friðbjörnsdóttir íslenskukennara þeirra. Rósa Kristín Jónsdóttir sigraði keppnina í Stapa í ár, sem er frábær árangur þar sem keppnin var einstaklega jöfn og spennandi. Allir lesarar stóðu sig með mikilli prýði og mjög erfitt var fyrir dómara að gera upp á milli þeirra. Það er því ljóst að nemendur í Reykjanesbæ hafa staðið sig afar vel í ræktunarhluta keppninnar í skólunum áður en til lokahátíðarinnar kom. Njarðvíkurskóli óskar Rósu Kristínu innilega til hamingju með frábæran árangur sem og Bríeti Silfá fyrir frábæran flutning.

Lífshlaupið fór fram dagana 7.-27. febrúar og tók starfsfólk Njarðvíkurskóla þátt eins og síðustu ár. Njarðvíkurskóli tók þátt í flokknum 70-149 starfmenn og voru í efsta sæti allan tímann. Njarðvíkurskóli var með 87% þátttökuhlutfall og sigruðu að lokum í sínum flokki í mesta fjölda daga og endaði skólinn í 4.sæti í fjölda mínútna. Teymið Heilsueflandi Grunnskóli hélt utan um þátttökuna og skipulagði ýmsa viðburði þessar þrjár vikur, t.d. göngu, bocciamót, bingó og lokahóf. Frábær frammistaða hjá okkar góða fólki.

23. febrúar var Stóra upplestrarkeppnin haldin á sal Njarðvíkurskóla. Það er 7. bekkur sem tekur þátt í þessari keppni og voru það 14 nemendur sem tóku þátt en fyrr í febrúar var haldin bekkjarkeppni þar sem þessir 14 nemendur unnu sér rétt til þátttöku á sal. Keppnin tókst einstaklega vel þar sem allir nemendur höfðu undirbúið sig vel, bæði í skólanum og líka heima fyrir. Jóhann Gunnar Sigmarsson íslenskukennari stýrði keppninni. Nemendur lásu hluta af sögunni Kennarinn sem hvarf og komu síðan aftur upp og lásu ljóð að eigin vali. Dómarar í keppninni í ár voru þau Haraldur Axel Einarsson grunnskólafulltrúi, Ásgerður Þorgeirsdóttir skólastjóri og Lára Guðmundsdóttir fyrrum skólastjóri í Njarðvíkurskóla. Sigurvegarar í keppninni fá keppnisrétt á lokahátíð Stóru upplestrarkeppninnar sem fer fram í Bergi 6. mars. Sigurvegarar í Njarðvíkurskóla voru Bríet Silfá Möller og Rósa Kristín Jónsdóttir. Jökull Gautason var svo valinn sem varamaður. Þau þrjú muna halda áfram að æfa og undirbúa sig fyrir lokakeppnina. Aðrir nemendur sem tóku þátt í skólakeppninni voru: Alan Boguniecki Einar Ernir Kristinsson Elfa Rut Hreiðarsdóttir Elin Mia Y Hardonk Emma Ástrós Gunnarsdóttir Fanney Helga Grétarsdóttir Harpa Rós Ívarsdóttir Helga Björg Bjarkadóttir Jón Ingi Davíðsson Kamilla Sigurlaug Miller Nína Björk Guðjónsdóttir

Öskudagurinn var haldinn hátíðlegur í Njarðvíkurskóla 14. febrúar 2024. Nemendur tóku þátt í fjölbreyttum þrautum í skólanum og í íþróttahúsinu auk þess að fara í draugahús. Öskudagur er skertur skóladagur í Njarðvíkurskóla sem og í öðrum grunnskólum í Reykjanesbæ. Nemendur voru í skólanum frá 8:15-11:20 og eftir það lauk skóla. Að loknum skóladegi fóru mörg börn niður í bæ og sungu fyrir góðgæti í hinum ýmsu fyrirtækjum í bænum.

Skólastarf verður í öllum leik- og grunnskólum í Reykjanesbæ, Suðurnesjabæ og Vogum á morgun mánudaginn 12. febrúar nema eitthvað óvænt komi upp á. Þetta á einnig við um starfsemi frístundaheimila. Þess má geta að skipulagt íþróttastarf hjá börnum og ungmennum fellur niður og því er engin frístundarúta í gangi. Vel gengur að koma og halda hita á skólabyggingum en starfsfólk sveitarfélaganna og aðgerðastjórn Suðurnesja hafa nýtt helgina til að koma fyrir hitablásurum í allar byggingar. Þó að hiti sé góður þá getur verið gólfkalt og því eru nemendur hvattir til að nota inniskó eða vera í ullarsokkum. Ekki er víst að Skólamatur geti afgreitt mat og væri því gott að foreldrar gerðu ráð fyrir að nesta börnin sín að minnsta kosti á morgun. Nánari upplýsingar frá Skólamat koma í kvöld. Staðan verður tekin reglulega og upplýsingar verða sendar frá skólastjórnendum til forráðamanna ef gera þarf breytingar og aðlaga skólastarf að þeim.