Njarðvíkurskóli

Páskafrí 2026

Fri, 27 Mar 2026 14:10:00 +0000

Páskafrí í skólanum hefst mánudaginn 30. mars. Kennsla hefst aftur samkvæmt stundaskrá þriðjudaginn 7. apríl. Við óskum öllum nemendum og forráðamönnum gleðilegra páska og vonum að þið njótið vel yfir hátíðarnar. Við hlökkum til að taka á móti öllum endurnærðum og tilbúnum í lokasprett skólaársins.

Friðarveggspjaldarsamkeppni Lions

Thu, 26 Mar 2026 12:45:00 +0000

Helga Margrét Steinarsdóttir nemandi í 7. KE hlaut í marsmánuði verðlaun frá Lionsklúbbnum Freyju fyrir þátttöku sína í Friðarveggspjaldakeppni Alþjóðahreyfingar Lions á Íslandi skólaárið 2025–2026. Í keppninni unnu nemendur veggspjöld út frá þemanu „Allir sem einn“. Verk Helgu vakti sérstaka athygli en í því sýnir hún á áhrifaríkan hátt hvernig íþróttir og félagsstörf geta sameinað fólk um allan heim – allir sem einn. Verðlaunin voru afhent í kennslustofu Helgu þar sem fulltrúar Lionsklúbbsins Freyju mættu ásamt Helenu Mariu myndlistakennara. Við óskum Helgu Margréti innilega til hamingju með þennan glæsilega árangur.

UPPFÆRÐ FRÉTT - Vegna veðurviðvörunar á morgun, fimmtudaginn 26. mars

Wed, 25 Mar 2026 14:08:00 +0000

UPPFÆRT 26. mars kl. 7:30 Neyðarstjórn sveitarfélagsins hefur farið yfir stöðuna. Skólahald fer fram í dag að óbreyttu. Þótt skólar séu opnir þurfa forsjáraðilar að meta hvort aðstæður séu öruggar fyrir börn að komast í og úr skóla og láta vita ef forföll verða eða ef börn komast ekki í skólann. Skráð verður leyfi eða forföll hjá þeim börnum. Mikilvægt er að fylgja börnum inn og út úr skólabyggingum til að tryggja öryggi, sérstaklega með hliðsjón af veðri, færð og aðstæðum í nærumhverfi. Allir vegir eru opnir og snjóþjónusta sveitarfélagsins er í fullum gangi til að halda vegum færum. Heima-og stuðningsþjónusta mun skerðast og verður þjónustu forgangsraðað til þjónustunotenda í dag. Dagþjónusta mun skerðast í dagdvölum eldri borgara, hæfingarstöðinni og Björginni en þjónusta í sólarhringsúrræðum hefur verið tryggð. Veðurstofa Íslands hefur gefið út appelsínugula veðurviðvörun sem gildir frá kl. 07:00 til 13:00 á morgun, 26. mars. Neyðarstjórn sveitarfélagsins hefur farið yfir stöðuna og fer skólastarf fram að svo stöddu nema annað verði sérstaklega tilkynnt. Forsjáraðilar eru eindregið hvattir til að meta hvort aðstæður séu öruggar fyrir börn að komast í og úr skóla. Mikilvægt er að fylgja börnum inn og út úr skólabyggingum til að tryggja öryggi, sérstaklega með hliðsjón af veðri, færð og aðstæðum í nærumhverfi. -------------- Förum varlega og fylgjumst vel með veðurspám og upplýsingum frá Veðurstofu Íslands, viðbragðsaðilum, sveitarfélaginu og öðrum þjónustuaðilum, þar á meðal varðandi akstur innanbæjarstrætó og aðra samgönguþjónustu. Við hvetjum öll til að huga að niðurföllum og lausamunum. Neyðarstjórn mun funda kl. 7:00 í fyrramálið og verða upplýsingar uppfærðar ef forsendur breytast.

Árshátíð Njarðvíkurskóla 2026

Tue, 24 Mar 2026 10:45:00 +0000

Árshátíð skólans fór fram við mikla gleði og glæsibrag föstudaginn 20. mars og var þemað í ár „Tímavélin“. Nemendur ferðuðust þar í gegnum tímann, þar sem hver árgangur valdi sér sinn áratug og setti upp skemmtilegt atriði í anda hans. Útkoman var fjölbreytt og litrík dagskrá sem frábæra einstaka stemningu. Íþróttahúsinu hafði verið breytt í glæsilegt leikhús þar sem ljós, hljóð og sviðsmynd sköpuðu skemmtilega stemmningu. Nemendur í 9. og 10. bekk gegndu lykilhlutverkum í undirbúningi og framkvæmd hátíðarinnar og sáu meðal annars um sviðsstjórn, ljós, hljóð og aðstoð á bak við tjöldin. Framlag þeirra skipti sköpum og stóðu þau sig með mikilli prýði. Það var augljóst að mikil vinna og metnaður lá að baki öllum atriðum og nemendur sýndu bæði sköpunargleði og samvinnu. Stemningin í salnum var frábær og var gaman að sjá hvað allir virtust skemmta sér vel. Að lokinni sýningu var boðið upp á kökur og drykki í skólanum þar sem gestir og nemendur gátu átt notalega stund saman að lokinni árshátíð. Það er óhætt að segja að árshátíðin hafi tekist einstaklega vel og eru margir farnir að hlakka til árshátíðar næsta árs.

Matsferill, stöðu- og framvindupróf í Njarðvíkurskóla

Mon, 23 Mar 2026 08:45:00 +0000

Nemendur í Njarðvíkurskóla í 4.-10. bekk hafa síðustu 3 vikur þreytt stöðu- og framvindupróf Matsferils í lesskilningi og stærðfræði. Prófin eru tekin á Chromebook tölvur og eru niðurstöður væntanlegar um miðjan maí. Nemendur hafa yfir höfuð staðið sig frábærlega, sýnt þrautseigju og dugnað auk þess að vera jákvæð fyrir prófatökunni. Lögboðið er að leggja prófin fyrir nemendur í 4., 6. og 9. bekk en ákveðið var í grunnskólum Reykjanesbæjar að allir nemendur í 4.-10. bekk sem fylgja námskrá árgangs taki prófin svo hægt sé að nota niðurstöður prófanna til skipulagningar kennslu í samræmi við stöðu nemenda og við mat á árangri kennslunnar. Tilgangur stöðu- og framvinduprófa Matsferils í lesskilningi og stærðfræði er að draga upp sem nákvæmasta mynd af stöðu nemanda og framvindu í námi, hvar áskoranir og styrkleikar liggja svo hægt sé að mæta námslegum þörfum nemenda á árangursríkan hátt.

Innritun í 1. bekk í grunnskóla

Tue, 17 Mar 2026 13:37:00 +0000

Er barnið þitt að hefja nám í 1. bekk í haust?

Árshátíð Njarðvíkurskóla 20. mars

Mon, 16 Mar 2026 10:13:00 +0000

Árshátíð Njarðvíkurskóla verður haldin föstudaginn 20. mars 2026. Nemendur mæta kl. 10:30 í heimastofur og fara þaðan saman með umsjónarkennara sínum yfir í íþróttahúsið. Sumir nemendur gegna sérstökum hlutverkum og mæta þeir samkvæmt fyrirmælum frá sínum kennara. Frístundaheimili skólans og í Ösp eru lokuð þennan dag. Hátíðardagskrá hefst kl. 11:00 í íþróttahúsinu við Njarðvíkurskóla. Þar verða frátekin sæti fyrir hvern árgang á gólfinu en gestir fá sæti í stúkunni og mögulega á öftustu röðum gólfsins. Íþróttahúsið opnar fyrir gesti kl. 10:30. Eins og hefð er fyrir verður árshátíðargestum boðið upp á kaffiveitingar í skólanum að dagskrá lokinni. Í boði verða skúffukaka og drykkir en í ár er skúffukakan í boði foreldrafélags Njarðvíkurskóla. Kaffiveitingar verða í heimastofum. Forráðamenn nemenda sem eiga heimastofurnar 209, 210, 211, 309, 310 og 311 ganga inn um inngang yngri barna við Norðurstíg en aðrir forráðamenn ganga inn um aðalinngang. Kaffiveitingar verða einnig í boði í Brekku fyrir nemendur og forráðamenn í 2. bekk. Athugið að nemendur koma ekki með síma á árshátíðina þar sem notkun síma og myndataka nemenda er ekki leyfð. Við hvetjum forráðamenn og aðra fjölskyldumeðlimi til að mæta og taka þátt í þessum skemmtilega degi. Gert er ráð fyrir að dagskrá í íþróttahúsinu taki um 60 mínútur og eftir það eru nemendur í umsjá forráðamanna. Við minnum alla nemendur á að mæta stundvíslega og snyrtilega klædd.

Lokahátíð Stóru upplestrarkeppninnar

Wed, 11 Mar 2026 12:37:00 +0000

Lokahátíð Stóru upplestrarkeppninnar í Reykjanesbæ fór fram í Hljómahöll þann 10. mars 2026 við hátíðlega athöfn. Þar komu saman fulltrúar grunnskólanna í bænum sem allir höfðu lagt mikla vinnu í undirbúning sinn. Njarðvíkurskóli átti tvo frábæra fulltrúa í keppninni, þær Berglindi Elvu Rafnsdóttur og Hrafnhildi Emblu Ægisdóttur, sem stóðu sig með mikilli prýði. Þær sýndu bæði öryggi og góða færni í upplestri og voru skólanum sínum til mikils sóma. Stóra upplestrarkeppnin er árlegur viðburður sem hefur það að markmiði að efla áhuga nemenda á móðurmálinu og vekja athygli á mikilvægi vandaðs upplestrar og skýrs framburðar. Keppnin er ætluð nemendum í 7. bekk og hefur um árabil verið einn af hápunktum skólaársins. Við í Njarðvíkurskóla erum afar stolt af fulltrúum okkar og óskum þeim innilega til hamingju með glæsilega frammistöðu.

Þemadagar: Fordómar, samskipti og samskipti

Thu, 05 Mar 2026 09:51:00 +0000

Vel heppnaðir þemadagar um fordóma, samkennd og samskipti í Njarðvíkurskóla Dagana 3. og 4. mars sl. fóru fram þemadagar í Njarðvíkurskóla. Hefðbundnu starfi var vikið til hliðar fyrir fjölbreytt verkefni undir yfirskriftinni „Fordómar – Samkennd – Samskipti“. Undirbúningur var í höndum umsjónarkennara og annars fagfólks sem unnu með sínum bekkjum. Markmiðið var að styrkja nemendur í jákvæðum samskiptum og efla samkennd, umburðarlyndi og virðingu fyrir fjölbreytileikanum. Í gegnum fjölbreytt verkefni tengdum samkennd og samskiptum og leitast við að auka meðvitund um fordóma, áhrif þeirra og leiðir til að sporna gegn þeim. Þemadagarnir tókust afar vel og var mikil ánægja með starfið hjá bæði nemendum og starfsfólki.

Soffía Ámundadóttir ræddi við nemendur í 7.-10. bekk

Fri, 27 Feb 2026 09:04:00 +0000

Þriðjudaginn 24. febrúar sl. kom Soffía Ámundadóttir í heimsókn í Njarðvíkurskóla og var með erindi á sal fyrir nemendur í 7.-10. bekk. Soffía er grunnskólakennari að mennt ásamt því að vera með diplómu í jákvæðri sálfræði. Hún er einnig knattspyrnuþjálfari og leiðbeinir á þjálfaranámskeiðum KSÍ ásamt því að starfa við menntavísindasvið HÍ. Soffía hefur starfað við kennslu og þjálfun í 30 ár og fékk styrk hjá Landsbankanum til þess að fara í grunnskóla og ræða við nemendur um forvarnir gegn ofbeldi. Nemendur voru mjög flottir á sal og í lokin unnu þau verkefni með því að skrifa falleg orð á bleik hjörtu sem mynduðu svo stórt hjarta á salnum okkar en tilefni bleiku hjartanna er minning um Bryndísi Klöru sem Soffía ræddi um í erindinu sínu. Viðfangsefni Soffíu voru tengd tilfinningum og tilfinningastjórnun. Hún ræddi um skilgreiningar á ofbeldi og birtingarmyndir auk þess að ræða um mögulegar ástæður fyrir því að börn beita ofbeldi. Þá fór Soffía yfir mikilvægi þess að nemendur hugi að sínu orðspori, hafi jákvæðar fyrirmyndir, sýni samkennd og hafi vaxandi hugarfar.

Stóra upplestrarkeppnin í Njarðvíkurskóla

Thu, 26 Feb 2026 13:27:00 +0000

Í morgun, 26. febrúar, fór fram skólakeppni Stóru upplestrarkeppninnar í 7. bekk í Njarðvíkurskóla. Nemendur sýndu þar glæsilegan árangur eftir markvissan undirbúning í vetur og ljóst var að þau höfðu lagt mikla alúð og vinnu í æfingar sínar. Undirbúningur hófst formlega á degi íslenskrar tungu í nóvember síðastliðnum og hafa nemendur æft sig undir leiðsögn íslensku- og umsjónarkennara þeirra Fríðu Sifjar og Kristbjargar. Í dómnefnd sátu Lára Guðmundsdóttir, fyrrverandi skólastjóri Njarðvíkurskóla, Haraldur Axel Einarsson grunnskólafulltrúi á menntasviði Reykjanesbæjar og Guðný Björg Karlsdóttir aðstoðarskólastjóri Njarðvíkurskóla. Dómnefndin stóð frammi fyrir vandasömu en ánægjulegu hlutverki að velja sigurvegara úr hópi hæfileikaríkra keppenda. Berglind Elva Rafnsdóttir og Hrafnhildur Embla Ægisdóttir stóðu uppi sem sigurvegarar með afar vandaðan og áhrifaríkan upplestur. Þær munu því keppa fyrir hönd skólans á lokahátíð Stóru upplestrarkeppninnar sem haldin verður í Hljómahöll 10. mars. Írena Káradóttir var valin varamaður og stóð sig einnig með miklum sóma. Lokahátíðin fer fram 10. mars í Hljómahöll þar sem nemendur úr öllum grunnskólum Reykjanesbæjar koma saman og sýna hæfileika sína í upplestri. Við óskum sigurvegurum innilega til hamingju og hlökkum til að fylgjast með þeim á lokahátíðinni.

Þemadagar 3.–4. mars – Fordómar, samkennd og samskipti

Tue, 24 Feb 2026 09:32:00 +0000

Dagana 3. og 4. mars 2026 verða haldnir þemadagar í Njarðvíkurskóla undir yfirskriftinni: Fordómar – Samkennd – Samskipti Markmið þemadaganna er að efla nemendur í jákvæðum og uppbyggilegum samskiptum, bæði innan skólans og utan hans. Við leggjum áherslu á að styrkja samkennd, umburðarlyndi og virðingu fyrir fjölbreytileikanum í samfélaginu, auk þess að auka meðvitund um fordóma – hvað þeir eru, hvernig þeir birtast, hvaða áhrif þeir geta haft og hvernig við getum spornað gegn þeim.

Öskudagur í Njarðvíkurskóla

Wed, 18 Feb 2026 12:30:00 +0000

Öskudagurinn var haldinn hátíðlegur í Njarðvíkurskóli í dag 18. febrúar. Nemendur og starfsfólk mættu í fjölbreyttum og litríkum búningum og settu skemmtilegan svip á skólastarfið. Að venju var dagurinn brotinn upp með fjölbreyttum og skemmtilegum þrautum bæði í skólanum og í íþróttahúsinu. Nemendur tóku virkan þátt, sýndu samvinnu og gleði og leystu verkefni af miklum áhuga. Þá var einnig boðið upp á draugahús sem vakti mikla lukku meðal nemenda. Í lok dags fengu allir pizzu að borða og fóru glöð heim í lok dags. Öskudagur er skertur skóladagur í skólanum og voru nemendur í skólanum frá kl. 8:15–11:20 og að því loknu lauk skóladegi og frístund tók við hjá þeim sem eru skráðir í frístund.

Öskudagur, starfsdagur og vetrarleyfi

Tue, 17 Feb 2026 12:58:00 +0000

Miðvikudaginn 18. febrúar verður skertur nemendadagur í tilefni af öskudegi. Dagskrá dagsins stendur frá kl. 8:15–11:15. Að henni lokinni fá nemendur pizzu í hádegismat áður en þeir fara heim. Frístundaheimilið í Njarðvíkurskóla og frístundaheimili í Ösp taka við skráðum nemendum að loknum skóladegi frá kl. 11:15 til 16:15. Við hvetjum alla nemendur til að mæta í litríkum og skemmtilegum búningum. Vinsamlegast athugið að ekki er heimilt að koma með neins konar vopn sem hluta af búningi. Fimmtudaginn 19. mars er starfsdagur og föstudaginn 20. mars er vetrarleyfi. Nemendur eiga frí báða dagana. Frístundaheimilið í Njarðvíkurskóal og í Ösp verða lokuð þessa daga.

Starfsfólk heiðrað fyrir 25 ára starfsaldur

Fri, 06 Feb 2026 09:35:00 +0000

Fimmtudaginn 5. febrúar heiðraði Reykjanesbær það starfsfólk sem hafði náð 25 ára starfsaldri á árinu 2025. Hér í Njarðvíkurskóla erum við það heppin að margt starfsfólk nær háum starfsaldri hjá okkur. Það voru því þrír starfsmenn frá Njarðvíkurskóla sem voru heiðraðir á þessari samkomu hjá Reykjanesbæ. Þetta voru þau Guðný Björg Karlsdóttir, Sigurlaug Ingvarsdóttir og Zoran Daníel Ljubicic

Ösp fær styrk frá Kiwanisklúbbnum Varða

Mon, 02 Feb 2026 14:02:00 +0000

Þriðjudaginn 27. janúar síðastliðin komu félagar úr Kiwanisklúbbnum Varða og færðu Ösp, sérhæfðu námsúrræði í Njarvíðukurskóla, veglegan styrk. Það er Ösp mikilvægt að finna fyrir velvild úr nærsamfélaginu og er það starfinu sem fer þar fram mikill styrkur. Þessi styrkur mun nýtast vel til að halda uppi því fjölbreyttu og góða starfi sem á sér stað í Ösp. Það voru þær Jóhann, Vigdís og Guðrún Sigríður sem færðu Ösp styrkinn og nemendur úr Ösp, Birta María, Alexander Aron, Lena og Kjartan Valur sem tóku á móti styrknum. Ösp þakkar Kiwanisklúbbnum Varða kærlega fyrir veittan stuðning.

Samtalsdagur 29. janúar

Tue, 20 Jan 2026 21:19:00 +0000

Fimmtudaginn 29. janúar er samtalsdagur í Njarðvíkurskóla. Forráðamenn bóka viðtal við umsjónarkennara í gegnum Mentor. Opnað var fyrir bókanir 20. janúar kl. 10:00 og geta forráðamenn þá bókað sín viðtöl. Þeir forráðamenn sem eru með túlk í viðtalinu fá úthlutað tímum frá umsjónarkennurum og fá tölvupóst á næstu dögum með tímasetningunum. Viðtöl fara fram í heimastofum nemenda. Þeir forráðamenn sem óska eftir viðtali við fag-, list- og verkgreinakennara, sem einnig eru til viðtals þennan dag, hafa samband við skrifstofustjóra skólans og bóka þau viðtöl fyrir samtalsdaginn. Hægt er að hringja í síma 420-3000 eða senda póst á njardvikurskoli@njardvikurskoli.is. Óski forráðamenn eftir að hafa samtalið á TEAMS þá þarf að senda póst á umsjónarkennara og óska eftir slíku viðtali en mikilvægt er þó að nemandinn sé einnig í viðtalinu. Nemendur eiga að mæta með forráðamönnum sínum í viðtalið.

Starfsdagur 20. janúar

Wed, 14 Jan 2026 11:35:00 +0000

Þriðjudaginn 20. janúar er starfsdagur í Njarðvíkurskóla. Allir nemendur eiga frí þennan dag. Frístundaheimili yngri nemenda og frístundaheimili í Ösp eru lokuð þennan dag.

Jóla- og nýárskveðja

Mon, 22 Dec 2025 14:20:00 +0000

Sendum okkar bestu jóla- og nýárskveðjur. Þökkum ánægjulegt samstarf á árinu sem er að líða. Skólastarf hefst að nýju eftir jólafrí mánudaginn 5. janúar 2026. Um er að ræða skertan nemendadag þar sem nemendur mæta samkvæmt stundatöflu frá kl. 9:55 og eru í skólanum til kl. 13:20 eða kl. 14:00, auk valgreina eftir því sem við á. Frístundaheimilin í Njarðvíkurskóla og í Ösp verða opin þennan dag frá kl. 8:15-9:55 og aftur frá kl. 13:20-16:15. Skrifstofa skólans er lokuð frá 22. desember og opnar aftur 5. janúar. Jólakveðja, Starfsfólk Njarðvíkurskóla

Jólahátíð Njarðvíkurskóla

Mon, 22 Dec 2025 08:40:00 +0000

Jólahátíð Njarðvíkurskóla var haldin með hátíðlegum hætti föstudaginn 19. desember, bæði á sal og í kennslustofum. Nemendur voru hjá umsjónarkennurum sínum þar sem þeir horfðu á helgileik sem nemendur í 6. bekk höfðu tekið upp í Ytri-Njarðvíkurkirkju fyrr í desember og héldu síðan litlu jólin saman. Að venju var dansað í kringum jólatréð áður en nemendur héldu svo inn í jólaleyfið.